Friday, May 1, 2015

MUME ACHINJA MKE WAKE KAMA KUKU,KISA " KAPATA WAPI PESA YA SALUNI"

HII ni zaidi ya ukatili! Jiji la Tanga bado linazizima kufuatia mauaji ya kutisha yanayodaiwa kufanywa na mwanaume aitwaye Khalfan Hamad (46), dhidi ya mkewe, Mary Lucas (20) kwa kumchinja na panga kisa kikidaiwa ni wivu wa mapenzi.

Tukio hilo lililoacha simulizi ya kushangaza miongoni mwa wanandoa na wanaotarajia kuingia, lilijiri Aprili 18, mwaka huu nyumbani kwa mwanaume huyo, Mtaa wa Mapinduzi ‘A’ Kata ya Duga jijini hapa.

WANACHOKIJUA POLISI WA TANGA

Kamanda wa Polisi Mkoa wa Tanga, ACP Zuberi Mwombeki alitangaza kwa waandishi wa habari kwamba, mauaji hayo yalitokea saa nne na nusu asubuhi ya Aprili 18 mwaka huu.

Alisema chanzo cha tukio hilo ni wivu wa kimapenzi kati ya wawili hao ambapo marehemu alimuomba mumewe pesa kiasi cha shilingi elfu kumi aende saluni kutengeneza nywele lakini mwanaume akasema hana.

“Mwanaume hakumpa pesa marehemu lakini baadaye alimkuta amesuka na ndipo ugomvi ulipoanzia hapo hadi kutokea mauaji hayo,” alieleza kamanda huyo.

MAJIRANI WANASEMAJE?

“Jamani sisi wenyewe tumeshtuka sana kwa kifo cha Mary, mimi nimeongea naye akiwa anakwenda saluni na hata aliporudi. Kama angejua ndiyo siku yake ya kufa naamini asingekwenda. Inauma sana!

“Mary alitoka saluni akiwa amependeza maana alitengenezwa nywele vizuri sana. Mimi mwenyewe nilimsifia. Kufika nyumbani kwake, mzozo ukaanza.

“Mumewe alitaka kujua alikotoa shilingi elfu kumi ya kuendea saluni maana yeye hakumpa. Mzozo ulikwenda hadi mwanaume akachukua panga na kumchinja. Naamini ni wivu,” alisema jirani mmoja.

KUMBE WALIKUWA NA HISTORIA YA UGOMVI

Jirani mwingine, Shaban Juma yeye alisema: “Hawa watu wameishi katika hali ya kutoelewana na walikuwa wakigombana kila wakati, lakini hatukujua kama litatokea hili kwani mara zote katika kugombana kwao, mwanaume ndiye aliyekuwa akipigwa jambo ambalo liliwafanya watu wa karibu yake kumshauri kuvunja uhusiano wao kulikoni aibu ya kupigwa na mke.”

Jennifer Charles yeye pia ni jirani, alisema: “Siku ya tukio Mary alimwomba mumewe hela ya kwenda kutengeneza nywele saluni lakini mume hakuwa na pesa siku hiyo lakini baada ya kuondoka nyumbani, marehemu naye alikwenda saluni.

“Baadaye mume aliporudi nyumbani hakumkuta Mary lakini mara alirudi akiwa ametengenezwa nywele jambo lililomfanya bwana kuhisi kuwa fedha hizo amehongwa na mwanaume mwingine tofauti na yeye na hivyo kuzuka ugomvi huo.”

MUME ALITOKA NJE AKITAMBA KUUA

Baada ya Jennifer kumaliza kusimulia hayo, Juma Ally, naye ni jirani, akaendeleza: “Hatukujua kilichoendelea katika mzozo wao, lakini baadaye ukimya ulitawala. Muda mfupi mbele mume alitoka nje na kutuambia kwamba ameshaua huko ndani kwani amechoka kupigwa na sasa amejibu mapigo.

“Kwanza tulijua anatutania lakini tulivyoona kimya kimezidi tukaamua kuingia ndipo

tulipomkuta marehemu akiwa chini, akitoka damu nyingi. Tuliogopa kwa kweli. Mary mrembo tunayemjua sisi, amelala chini na damu chapachapa.

“Alikuwa ana majeraha makubwa sehemu ya shingo na kichwani yaliyotokana na kupigwa na panga. Ilionekana panga lilikuwa kali sana na panga lenyewe lilikuwa pembeni yake. Ndipo tulipoamua kumkimbiza Hospitali ya Mkoa, Bombo ambapo alipoteza maisha wakati madaktari wakihangaika kuokoa uhai wake.”

ASINGEKUFA MKE

Naye, Fatuma Ramadhani alisema kutokana na ugomvi wa mara kwa mara kati ya wawili hao na mwanaume kupigwa kila wakati, majirani waliamini siku moja mume huyo ndiye angekuja kupata madhara hata kufa kutokana na alivyokuwa akipigwa.

MTUHUMIWA KUPANDA MAHAKAMANI WAKATI WOWOTE

Kamanda Mwombeki alisema upelelezi unaendelea ili kuweza kumfikisha mahakamani mtuhumiwa huyo.

Marehemu Mary alizikwa katika eneo la Mwakizaro jijini Tanga, siku ya pili baada ya tukio hilo la kuhuzunisha.

Unaweza Kujiunga Nami Hapa Ili Nikutumie Habari Mara tu Zikitokea Bofya HAPA U Like PAGE YANGU!

DIAMOND MWANANGU USISUBIRI NIFE!

Maskini! Wakati leo akiangusha pati ya nguvu na mpenzi wake, Zarinah Hassan ‘Zari The Boss Lady’ inayokwenda kwa jina la Zari All White Party kwenye Ukumbi wa Mlimani City, Dar, baba mzazi wa mwanamuziki Nasibu Abdul ‘Diamond Platnumz’, Abdul Jumaa yu hoi kitandani huku akimtaka mwanaye huyo kuonesha msamaha wa kweli aliotangaza kwenye vyombo vya habari na kwamba asisubiri hadi afe.

Baba mzazi wa ‘Diamond Platnumz’

TUJIUNGE NA CHANZO
Habari kutoka kwa chanzo makini kilicho karibu na baba Diamond kilidai kwamba kutokana na hali tete ya mzazi huyo ambapo kwa sasa anasumbuliwa na miguu kwa mara nyingine huku ikitoka magamba na kushindwa kutembea kwa muda mrefu, amekuwa akimlaumu mwanaye huyo kupita kiasi.

Diamond Platnumz

Chanzo hicho kilisema kuwa mzazi huyo amekuwa akisema kama alimkosea Diamond, alishamuomba msamaha na akasema amemsamehe lakini hakuonesha mabadiliko yoyote kwake wakati alikiri hadharani kupitia vyombo vya habari. Kiliendelea kueleza kwamba kutokana na jambo hilo baba Diamond amekuwa akiumia kwani mwanaye huyo baada ya kutangaza amemsamehe hajaonesha mabadiliko yoyote ya kumjali.
MALALAMIKO
Chanzo hicho kilidai kwamba, baba Diamond amekuwa akilalamika kuwa ameugua kwa muda mrefu lakini Diamond hajawahi kwenda kumjulia hali hata siku moja.“Ukweli baba Diamond anaumia sana. Sasa hivi anaumwa, ameshindwa hata kutoka nje, miguu imevimba na ina muonekano wa ajabu, amekuwa akisema hajui ni kwa nini mwanaye anashindwa kulegeza moyo wake na kumsamehe wakati alishakiri kwenye vyombo vya habari.“Anasema bora akaenda sasa hivi wakasameheane kuliko asubiri hadi siku akifa ndipo aende,” kiliongeza chanzo hicho.
BOFYA HAPA KUMSIKIA BABA DIAMOND
Baada ya kupata habari hizo, gazeti hili lilitinga nyumbani kwa baba Diamond au Dangote maeneo ya Magomeni-Kagera, Dar na kumkuta akiwa katika hali mbaya kwani miguu imevimba huku ikiwa imepoteza muonekano wa kawaida na kuwa na ngozi ya ajabu.
Baada ya salamu, wanahabari wetu walimuuliza kulikoni yupo katika hali hiyo na kama Diamond alikuwa amekwenda kumjulia hali ambapo alikuwa na haya ya kusema:“Ukweli nimeugua kwa muda mrefu lakini mwanangu Diamond hajawahi kuja kuniona.
AMTUMIA MESEJI
“Hali hiyo ilinifanya juzikati kumwandikia meseji ya kukata tamaa na kumwambia kwamba anaona ameshanizika kutokana na kunisahau kwake lakini Diamond hakunijibu.“Namshukuru Mungu kwa sababu nina kibanda changu cha kulala, silipi kodi kuna watu walishanishauri eti niwatume watu wakaongee naye lakini nilikataa kwa sababu haoni thamani yangu.
ANASUBIRI NIFE?
“Kama ni tofauti na mama yake (Sanura Kassim), tulishamaliza na kabla hajaugua alikuwa anakuja kuniona, nikimuuliza kuhusu Diamond alikuwa akiniambia alishaongea naye lakini kila siku alikuwa akisema atakuja tu kuniona mpaka leo sijamuona labda anasubiri hadi nife ndiyo aje.
“Mara ya mwisho kumuona ilikuwa ni kipindi kile alivyomvisha pete ya uchumba Wema Sepetu ndiyo alimleta kwangu kumtambulisha, tangu hapo huwa namsikia tu kwenye vyombo vya habari. Inauma sana; “Yote kwa yote haya ni maisha tu.”
DIAMOND YUPO BIZE
Ijumaa lilimtafuta Diamond ili kumfikishia habari juu ya baba yake ambapo hakupatikana hewani lakini watu wake wakaribu (Wasafi Classic Baby) walidai kwamba bosi wao huyo alikuwa yupo bize na Zari kwa ajili ya pati yao leo
CHANZO: GPL

TAARIFA RASMI YA KAWA JANA

Taarifa rasmi: Yaliyojiri katika kikao cha UKAWA 30.04.2015

UMOJA WA KATIBA YA WANANCHI (UKAWA),
DAR ES SALAAM,
TANZANIA.

TAARIFA KWA UMMA,
DAR ES SALAAM, ALHAMIS, 30 APRIL 2015

UCHAGUZI MKUU OKTOBA 2015 LAZIMA, KIKWETE ASIONGEZEWE MUDA, KURA YA MAONI BAADAE

Vyama vinavyounda Umoja wa Katiba ya Wananchi (UKAWA) leo vimetoa msimamo wao juu ya njama za kuahirisha Uchaguzi Mkuu unaotakiwa kufanyika Oktoba mwaka huu. UKAWA imesisitiza kwamba kuahirisha Uchaguzi Mkuu huo ni sawa na kumuongezea Rais Jakaya Kikwete na Chama chake cha Mapinduzi muda wa kuendelea kutawala Tanzania. UKAWA imesema jaribio lolote la kuahirisha Uchaguzi Mkuu kwa kisingizio chochote kile litakuwa kinyume na Katiba ya sasa ya Jamhuri ya Muungano wa Tanzania na litahesabika kuwa ni sawa na mapinduzi dhidi ya Katiba (constitutional coup d’etat). Msimamo wa UKAWA unafuatia kumalizika kwa Kikao cha Viongozi Wakuu wa Vyama vinavyounda UKAWA (UKAWA Summit) kilichofanyika katika Makao Makuu ya Chama cha Wananchi (CUF), jijini Dar es Salaam kati ya tarehe 28 na 29 Aprili mwaka huu.

Akielezea msimamo wa UKAWA juu ya suala hili, mwenyeji wa Kikao hicho na Mwenyekiti wa CUF Profesa Ibrahim Lipumba alisema kwamba kuna dalili za kuonyesha kwamba zipo njama za kuahirisha Uchaguzi Mkuu na kumuongezea Rais Kikwete na CCM muda wa kutawala. “Tume ya Taifa ya Uchaguzi (NEC) haijaanza maandalizi yoyote kwa ajili ya Uchaguzi Mkuu licha ya kwamba imebaki miezi sita tu Uchaguzi huo ufanyike kwa mujibu wa Katiba. Shughuli zinazohusiana na maandalizi ya Uchaguzi Mkuu na vifaa vinavyotumika kwa ajili yake ambavyo kwa taratibu za miaka yote huanza kufanyika angalau mwaka mmoja na nusu kabla ya Siku ya Uchaguzi hazijaanza kufanyika, vifaa vinavyohitajika havijanunuliwa na fedha kwa ajili hiyo hazijatengwa hadi sasa.”

Profesa Lipumba aliongeza kwamba jambo hili limefanyika kwa makusudi kwa sababu vyama vya UKAWA vimekuwa vinapigia kelele suala la maandalizi ya Uchaguzi Mkuu tangu mwaka 2012. “Licha ya madai ya muda mrefu ya Kambi Rasmi ya Upinzani Bungeni kwamba ratiba ya Uchaguzi Mkuu wa 2015 imevurugwa kwa makusudi kwa kutokutenga fedha kwa ajili hiyo katika bajeti ya Serikali tangu mwaka 2012, Serikali hii ya CCM haijatoa fedha kwa NEC kwa ajili ya Uchaguzi Mkuu. Badala yake, NEC imeendelea kutangaza kwamba inafanya maandalizi kwa ajili ya Kura ya Maoni kuhusu Katiba Inayopendekezwa ambayo imepitwa na muda kisheria na haiwezi kufanyika tena bila kwanza kufanyika kwa marekebisho katika Sheria ya Kura ya Maoni (the Referendum Act) ya mwaka 2013.”

Kwa mujibu wa Profesa Lipumba, Kura ya Maoni ilitakiwa ifanyike ndani ya siku 124 kutoka tarehe Rais Kikwete alipotoa Tangazo la Kura ya Maoni na kutamka kuwa Kura hiyo itafanyika tarehe 30 Aprili, 2015, yaani leo. Profesa Lipumba alisema: “Kwa Sheria ya Kura ya Maoni ilivyo kwa sasa, hakuna uwezekano wa Kura ya Maoni kufanyika tena bila kwanza kufanya marekebisho ya Sheria hiyo. Kila hatua inayotakiwa kuchukuliwa chini ya Sheria hiyo imewekewa muda wake na muda huo haubadiliki. Tangazo la Kura ya Maoni likishatolewa na tarehe kutangazwa haibadilishwi kwa sababu yoyote ile. Hakuna namna yoyote ya kuahirisha Kura ya Maoni na kuifanya tarehe nyingine yoyote.”

Profesa Lipumba aliongeza: “Haya ndio masharti ya Sheria ya Kura ya Maoni. Yasipofuatwa hakuna namna ya kuyarekebisha bila kwanza kurekebisha Sheria yenyewe. Na hadi sasa Serikali hii ya CCM haijapeleka Muswada wa Sheria kuirekebisha Sheria hiyo ili kuwezesha Kura ya Maoni kufanyika kwa tarehe nyingine. Tunashangazwa na Tume inayoongozwa na aliyekuwa Jaji wa Mahakama ya Rufani ambayo ndio mahakama ya juu kabisa katika nchi yetu, na Mkurugenzi wa Uchaguzi ambaye ni Mwanasheria Mwandamizi wa Serikali, kuendelea kutangaza kwamba Kura ya Maoni itafanyika kwa terehe itakayotangazwa baadae wakati Tume inafahamu kwamba jambo hilo haliwezekani kisheria. Kama bado CCM na washirika wake wanataka Katiba Inayopendekezwa ipigiwe Kura ya Maoni na Watanzania ni lazima wapeleke Muswada wa Marekebisho ya Sheria ya Kura ya Maoni Bungeni. Vinginevyo itakuwa na ubatilifu mtupu kama tuliouona wakati wa Bunge Maalum.”

Aidha, UKAWA imesema haiko na haitakuwa tayari kuunga mkono jitihada zozote za kumuongezea Rais Kikwete na CCM muda wa kutawala kwa kuahirisha Uchaguzi Mkuu wa mwaka huu. Kwa mujibu wa Mwenyekiti Mwenza wa UKAWA na Mwenyekiti wa Chama cha NCCR-Mageuzi, Mheshimiwa James Mbatia, haijawahi kutokea Uchaguzi Mkuu ukaahirishwa kwa sababu yoyote tangu mwaka 1960 tulipofanya Uchaguzi Mkuu uliotupatia Serikali ya Madaraka ya Ndani hadi sasa.
Mheshimiwa Mbatia alisema: “Watu hawa wanafahamu kuwa tumekuwa tukifanya Uchaguzi Mkuu kila baada ya miaka mitano tangu mwaka 1960. Hata mwaka 1980, miezi michache baada ya kutoka vitani dhidi ya nduli Iddi Amin wa Uganda na licha ya Baba wa Taifa Mwalimu Nyerere kutangaza miezi 18 ya kujifunga mikanda kwa sababu ya hali mbaya ya uchumi iliyosababishwa na Vita ya Uganda, hatukuahirisha Uchaguzi Mkuu wa mwaka huo. Watu hawa wanafahamu kwamba Katiba yetu hairuhusu Uchaguzi Mkuu kuahirishwa kwa sababu yoyote ile.

Wanafahamu kwamba tangu mwaka 1985, Rais anatakiwa atumikie vipindi viwili tu vya miaka mitano mitano. Wanafahamu kwamba maisha ya Bunge ni miezi sitini au miaka mitano kuanzia tarehe ya Uchaguzi Mkuu na haiwezekani kwa maisha hayo kuongezewa muda kikatiba bila ya kufanyika Uchaguzi Mkuu. Na wanafahamu kwamba Rais Kikwete anakamilisha kipindi chake cha pili mwezi Oktoba mwaka huu na maisha ya Bunge la Kumi yanamalizika mwezi huo. Kuruhusu Uchaguzi Mkuu uahirishwe kwa kisingizio chochote kile ni kuwazawadia wazembe na kuwaongezea mafisadi wanaolimaliza taifa letu kwa ufisadi muda wa kuendelea na ufisadi huo. UKAWA haitakubali kuruhusu jambo hilo litokee.”

Aidha, UKAWA imesisitiza kwamba haitakubali na haitaunga mkono jaribio lolote la kufanya marekebisho katika Katiba ya sasa kwa lengo la kumuongezea Kikwete, chama chake na Serikali muda wa kutawala. Akielezea msimamo huo, Mwenyekiti Mwenza wa UKAWA na Mwenyekiti wa chama cha National League for Democracy (NLD) Dkt. Emmanuel Makaidi amesisitiza kwamba suala la vipindi viwili vya miaka mitano mitano kwa Rais wa Jamhuri ya Muungano ni nguzo kuu muhimu ya Katiba ya sasa na UKAWA haitakubali nguzo hiyo iguswe au kufumuliwa kwa sababu au kisingizio chochote kile. Dkt. Makaidi alisema: “Kubadilisha Katiba ya sasa kwa lengo la kuahirisha Uchaguzi Mkuu wa Oktoba mwaka sio tu kutaathiri misingi muhimu ya Katiba ya sasa, bali pia kutahatarisha amani ya nchi yetu. Tumeona kinachoendelea Burundi baada ya Rais Pierre Nkurunzinza na chama chake kuamua kujiongezea muda wa kutawala nchi hiyo. Tumeona yanaoendelea Jamhuri ya Kidemokrasi ya Congo (DRC) baada ya Joseph Kabila kutaka kufanya hivyo hivyo. Kikwete na wanaCCM wenzake wasitake kuiingiza nchi yetu katika majanga yasiyokuwa na sababu.”

Kwa upande mwingine, UKAWA imeitaka NEC kuhakikisha kwamba wananchi wote wenye sifa ya kuandikishwa kwenye Daftari la Kudumu la Wapiga Kura wanaandikishwa kwenye Daftari hilo. Katika Mkutano wake na vyama vya siasa uliofanyika Dar es Salaam tarehe 9 Julai mwaka jana, Mwenyekiti wa Tume Jaji Damian Lubuva alisisitiza kwamba NEC ilikuwa na uwezo na vifaa vya kuandikisha takriban wapiga kura milioni 24 katika vituo vya kuandikishia 40,000 nchi nzima kwa muda wa siku 14 katika kila kituo cha kuandikishia. Mwenyekiti Mwenza wa UKAWA na Mwenyekiti wa CHADEMA Mheshimiwa Freeman Mbowe alieleza kushangazwa kwa UKAWA na matamko ya Tume kwamba sasa Tume itaandikisha wapiga kura kwa muda wa siku saba katika kila kituo.

Mwenyekiti Mbowe alisema: “Tume iliwaahidi Watanzania kwamba watu wote wenye sifa wataandikishwa katika Daftari la Wapiga Kura. Sisi wa UKAWA tulishauri muda wa kuandikisha uongezwe hadi angalau siku 28 kama ilivyokuwa kwa Uchaguzi Mkuu uliopita lakini Tume iling’ang’ania kwamba muda wa siku 14 unatosha. Leo Tume inapunguza muda huo wakati tunafahamu kwamba Tume ina vifaa pungufu vya kuandikishia wapiga kura kuliko ilivyoomba kupatiwa na Serikali hii ya CCM. Hii ni njama ya Tume na ya Serikali hii ya CCM kuhakikisha wapiga kura wengi hawaandikishwi. Sisi UKAWA hatutakubali jambo hilo litokee.”

Wakati huo huo, Viongozi Wakuu wa UKAWA wameeleza kushangazwa na taarifa zilizosambazwa na baadhi ya vyombo vya habari hapa nchini kwamba Chama cha NCCR-Mageuzi kimejitoa au kimeandika barua ya kuomba kujitoa kwenye UKAWA. Viongozi hao wamesema kwamba taarifa hizo ni uzushi mtupu unaosambazwa na wapiga ramli na wanajimu wa kiama cha UKAWA kwa lengo la kuipatia CCM na vyama vibaraka wake ahueni ya kisiasa. Akikanusha taarifa hizo, Mwenyekiti wa NCCR-Mageuzi Mheshimiwa Mbatia amesema kwamba yeye mwenyewe na Katibu Mkuu wake Mosena Nyambabe pamoja na maafisa wa chama chake wamekuwa katika hatua zote za vikao vya UKAWA kuanzia Kamati ya Ufundi na ile ya Wataalam hadi Kikao cha Viongozi Wakuu kilichomalizika jana.

Mheshimiwa Mbatia alisisitiza: “Tangu juzi tupo hapa tukijadiliana namna ya kupata wagombea wa UKAWA wa ngazi zote kuanzia Urais, Ubunge hadi Udiwani. Kwa kiasi kikubwa tumeshakamilisha kazi ya kupata wagombea Ubunge wa UKAWA. Tumeshapata muafaka kwa zaidi ya asilimia 95 ya majimbo yote ya Uchaguzi Tanzania, na majimbo 12 yaliyobakia tunaendelea kuyashughulikia na tutayapatia ufumbuzi muda si mrefu. Tunaendelea na majadiliano juu kupata Mgombea Urais na Makamu wa Rais wa Jamhuri ya Muungano atakayepeperusha bendera ya UKAWA. Tumeshakamilisha kazi hiyo kwa upande wa Zanzibar na tutaikamilisha kwa upande wa Jamhuri ya Muungano katika muda muafaka. UKAWA iko imara sasa kuliko kipindi kingine chochote tangu Bunge Maalum mwaka jana. Hao wanaosambaza uzushi kwamba tumefarakana na kwamba sisi NCCR tumejitoa au tunataka kujitoa watafute hoja nyingine. Hii imebuma.”
Mungu Ibariki Tanzania!
Imetolewa na;

---------------------------------------
Prof. Ibrahim Haruna Lipumba,
Mwenyekiti – CUF – Chama Cha Wananchi,

-----------------------------------
Mh.Freeman Mbowe (MB),
Mwenyekiti - CHADEMA

--------------------------------------
Mh.James Francis Mbatia(MB),
Mwenyekiti – NCCR MAGEUZI.

--------------------------------------
Mh. Dkt. Emmanuel Makaidi
Mwenyekiti – NLD.

Mbowe Apata Mpinzani wa Ubunge Hai

Aliyekuwa Mwenyekiti wa Bodi ya Chama Kikuu cha Ushirika mkoani Kilimanjaro (KNCU) Maynard Swai, ametangaza kuwania ubunge katika Jimbo la Hai kwa tiketi ya Chama Cha Mapinduzi (CCM).

Kwa tangazo hilo, Swai sasa atakuwa na kibarua kizito cha kukabili upinzani kutoka kwa mbunge wa sasa wa jimbo hilo, Freeman Mbowe (Chadema) ambaye tayari ametangaza nia ya kutetea nafasi yake katika Uchaguzi Mkuu ujao.

Hata hivyo, kurudi kwa Mbowe kwenye kinyang’anyiro cha ubunge jimboni humo kutategemea uamuzi wa Umoja wa Katiba ya Wananchi (Ukawa) ambao utalazimika kumkubali au kumkataa kupitia vikao vyake vya kupanga wagombea.

Swai anatakiwa kupita kwenye kura ya maoni ndani ya CCM, kabla hajawa mgombea rasmi.

Swai ambaye ni kada wa kwanza wa CCM kufungua pazia la kutangaza nia ya kugombea ubunge katika jimbo la Hai, alisema jana kuwa dhamira yake ni kufanya kazi na wananchi ndani ya jimbo hilo, tofauti na sasa ambapo wawakilishi wengi wanaomba kura na wakipata wanahamia Dar es Salam.

“Nimeamua kuingia kwenye siasa niendelee kuwatumikia wananchi. Ifike mahali kiongozi anayechaguliwa aishi na wananchi ili ajue shida zao, matatizo yao na changamoto walizonazo na siyo unapewa heshima na wananchi, lakini ukipata huonekani ukiwatumiakia,” alisema Swai.

Alisema iwapo chama kitampa ridhaa ya kugombea, atahakikisha anawaweka vijana pamoja na kutatua changamoto zinazowakabili likiwemo suala la ajira.HUU NDI UONGOZI

CHANZO Mpekuzi blog

Friday, May 1, 2015

Serikali yaipa Taboa wiki mbili, mgomo wasitishwa rasmi

Serikali imewapa Wamiliki wa Mabasi (Taboa) wiki mbili za kutafakari namna gani watapata hasara, iwapo watatumia nauli mpya zilizopendekezwa na Mamlaka ya Udhibiti na Usimamizi wa Usafiri wa Nchikavu na Majini (Sumatra).

Hatua hiyo imekuja baada ya wamiliki hao juzi kutangaza kuwa wangeanza mgomo wa siku saba kuishinikiza Serikali ibatilishe matumizi ya nauli mpya ilizozipitishwa kutokana na kushuka kwa bei ya mafuta duniani.

Akizungumza jana, Katibu Mkuu wa Taboa, Enea Mrutu alisema kuwa baada ya mazungumzo na katibu mkuu wa Wizara ya Uchukuzi walifikia mwafaka huo na kwamba vielelezo hivyo vitakapokamilika wataendelea na majadiliano.

“Tumepewa wiki mbili za kuandaa ushahidi wa namna tutakavyopata hasara kwa matumizi ya nauli mpya tutaendelea na biashara kama kawaida wakati tukilifanyia kazi suala hilo.

"Tutawapa vielelezo vya namna gharama nyinginezo zilivyopanda na kuathiri ustawi wetu,” alisema Mrutu.

Mrutu alifafanua kuwa kigezo kilichotumika kushusha bei kilikuwa cha muda mfupi na hakikuzingatia mambo mengine yanayoongeza gharama za biashara ya usafirishaji na kuitaka Serikali kuanzisha ruzuku au kuondoa ushuru kwa vipuri vya vyombo vya safari.

“Ni kama walitaka kutukomoa hivi…kama mafuta yameshuka bei kwa nini mabasi ya masafa marefu tu ndiyo yatakiwe kupunguza nauli ilhali sekta nyingine zikiendelea kama kawaida,” alisema na kuongeza:

“Daladala zinatumia mafuta kama ilivyo malori na hata mashine za kusaga nafaka, lakini wao wameachwa. Unga haujashuka bei wala gharama za kukodi lori hazijapungua pia.”

Baada ya taarifa za mgomo kusambaa, wasafiri wengi walibadili ratiba zao huku baadhi ya mabasi yakisitisha uuzaji wa tiketi kwa ajili ya safari za jana kabla ya saa mbili usiku taarifa za kutokuwapo kwa mgomo huo kutolewa.

Hali hiyo ilisababisha mabasi mengi kuondoka na abiria wachache tofauti na siku nyingine.

“Ni lazima yaondoke hata kama yana abiria watano kwa sababu yana wateja huko mikoani ambao ni lazima wasafiri kuja mjini kesho, taarifa zisizo na uhakika ambazo zilikuwa zinabadilika, ndizo zilizochangia hasara watakayoipata leo,” alisema Hussein Abdul mmoja wa makarani katika stendi ya Ubungo.

Licha ya kuahirishwa kwa mgomo huo, kuanzia alfajiri jana mpaka saa nne asubuhi wakati mabasi ya mikoani na nchi jirani yakiendelea kuondoka, Jeshi la Polisi lilikuwa limeimarisha ulinzi.

Mkuu wa Kikosi cha Usalama Barabarani katika stendi hiyo, Inspekta Yusuf Kamotte alisema walifanya hivyo ikiwa ni tahadhari dhidi ya wahuni ambao hutuma fursa kama hizo kufanya uhalifu.

“Jeshi lazima lijiridhishe hata kwa lolote linalosemwa na kuonekana kuwa na dalili za kutokea kwa uhalifu. Wanaweza wasiwe Taboa, lakini vibaka wangeweza kufanya yao dhidi ya abiria na wapita njia,” alisema Inspekta Kamotte.

CHANZO Mpekuzi blog

HAO NDIO VIONGOZI WETU WANASEMA BAADA YA KUTOLEWA

Mzee Moyo: Nilitumwa Kumshawishi Seif Akubali Matokeo 2010.......Pamoja Na Kuifanya Kazi Hiyo, Tuzo Waliyonipa CCM ni Kunivua Uanachama

Mwanasiasa mkongwe aliyevuliwa uanachama wa CCM, Hassan Nassor Moyo (80) amesema yeye ndiye aliyefanya kazi kubwa, usiku kucha, kumshawishi Maalim Seif Sharrif Hamad, aliyekuwa mgombea urais wa Zanzibar kwa tiketi ya CUF, akubaliane na matokeo ya Uchaguzi Mkuu mwaka 2010 kabla ya hata kutangazwa.

Akizungumza katika mahojiano maalumu na mwandishi wa habari hizi nyumbani kwake Tanga siku chache baada ya Halmashauri Kuu ya CCM ya Mkoa wa Magharibi, Unguja kumvua uanachama, Moyo alisema alitumwa na Rais Amani Abeid Karume kufanya kazi hiyo kwa bidii, utiifu na uadilifu hadi akafanikiwa.

Moyo alifanya kazi mbalimbali akiwa waziri kwenye Baraza la Mapinduzi Zanzibar na akiwa waziri katika Serikali ya Jamhuri ya Muungano katika maisha yake ya utumishi wa kisiasa, lakini akajikuta akipata tuzo ya kuvuliwa uanachama wa CCM akiwa ameshastaafu siasa kwa madai ya kuhudhuria mikutano ya hadhara ya CUF.

Moyo alisema kuwa Mohamed Riyami, ambaye ni mmoja wa wajumbe wa Kamati ya Maridhiano, alikwenda nyumbani kwake na kumpa ujumbe huo kutoka kwa Rais Karume, na baada ya majadiliano naye, alikubali.

“…Ni kweli Mohamed Riyami alikuja kuniamsha saa 10:00 alfajiri hivi akisema ametumwa na Rais Karume aje aniambie nikamwombe Maalim Seif aridhie matokeo ya uchaguzi mkuu yatakayotangazwa,” alisema Moyo.

“Nilimuuliza Riyami, nikamwambie nini Seif? Akaniambia utajua wewe. Nikamwambia au ndo tumeshindwa? Riyami akatabasamu tu!

“Kwa hiyo, nilikwenda kuzungumza naye. Nilimwambia wewe (Seif) umezoea kushindwa na mimi (CCM) nimezoea kushinda, kubaliana na matokeo,” alisema.

Alipoulizwa kama ni kweli maneno hayo tu ndiyo yalimlainisha Maalim Seif aridhie matokeo hayo, Moyo alijibu;

“Hapana, nilizungumza naye kwa kina historia ya mabadiliko, tulikotoka, kufikia kuundwa kwa kamati za miafaka mpaka sasa, naye alikubali.”

Baada ya kukubaliana, Moyo alisema kuwa Maalim Seif alikwenda kuwaambia vijana wake waliokuwa kwenye kituo cha kuhesabia kura katika Hoteli ya Bwawani waondoke, na baada ya vijana wake kuondoka, Tume ya Uchaguzi ya Zanzibar (ZEC) ikatangaza matokeo yaliyompa ushindi Dk Ali Mohamed Shein.

Hata hivyo, Moyo alikataa kuweka wazi kama hatua yake kwenda kwa Maalim Seif ililenga kumshawishi akubali kushindwa wakati matokeo yalionyesha ameshinda. Pia, hakutaka kuweka bayana kama wakati anakwenda kwa Seif alikuwa anajua matokeo.

Alipoulizwa kama atakuwa tayari mwaka huu kutumwa tena kwenda kumshawishi Maalim Seif akubaliane na matokeo, alisema:“Hapana. Sithubutu. Hapa inatosha.”

Aidha, Moyo amewashauri wanaCCM wasimbeze wala kumdharau Maalim Seif.

“Watu wajiulize, miafaka mingapi ilifikiwa Zanzibar, lakini haikutekelezwa? Mwafaka wa sasa uliowezesha kufanyiwa marekebisho Katiba na kuundwa Serikali ya Umoja wa Kitaifa ni matokeo ya mchango wa Seif na Rais Karume.”

Awaonya CCM

Pia, amewataka wana-CCM kujifunza historia ya chaguzi zilizopita kuanzia ule wa mwaka 1963 ambao ASP ilijinasibu kuwa itashinda na ikapeleka hivyo ujumbe kwa Mwalimu Julius Nyerere wa Tanganyika, lakini muungano wa ZNP (Zanzibar Nationalist Party) na ZPPP (Zanzibar na Pemba People’s Party ndio ulishinda.

“Lakini historia ya leo inaonyesha Pemba nzima iko chini ya CUF, CCM haiko kule iko Unguja tu ambako CUF imeanza kushinda viti. Tunatumia sana hisia kwamba tutashinda, dhana hii ni potofu,” alisema.

“Na mwaka huu CUF wanapata nguvu zaidi kwani wanaungwa mkono na vijana wanaotaka misingi iliyoasisiwa na Afro Shiraz Party ya kupinga ukabila, rangi na udini; vijana ambao wanapigania Zanzibar iwe na mamlaka yake.”

Alipoulizwa kuwa haoni kwamba alifanya kosa kuhudhuria na kuhutubia mikutano ya hadhara ya CUF, alijibu kuwa hakwenda kama mwana-CCM bali alialikwa kama mwenyekiti wa Kamati ya Maridhiano na kwamba CCM hawana kawaida ya kumwalika.

Aonyesha hekima

Pia, alipoulizwa anawaambia nini waliomfukuza, Moyo alijibu: “Sina cha kuwajibu kwa sababu daima mwanasiasa hupaswi kuongeza maadui bila sababu za msingi. Wao hawanitaki basi na wala sina mpango wa kujiunga na chama chochote cha siasa.”

Moyo ni kati ya waasisi wawili wa Muungano wa Tanganyika na Zanzibar ambao wako hai, mwingine akiwa rais wa zamani wa Zanzibar, Alhaji Aboud Jumbe.

Kama Umeguswa na Hili, Wasiliana na Natasha

Kutangaza hapa piga : 0712 500 445

Niko na mashoga zangu Jangwani Sekondari.kuna wanafunzi zaidi ya 70 wenye ulemavu na wana tatizo la miundo mbinu hasa linapokuja suala la choo na njia ya kwenda maktaba.ndugu zangu wa SVF wamejutolea kujenga choo na hiyo njia.kama nawe unaguswa tuwasiliane ili kwa pamoja tuwarahisishie maisha warembo wetu hawa.
Wote wana ndoto zao.baadhi wanataka kuwa waigizaji.hebu kuwa mmoja wao wa kutimiza ndoto zao.
Na: Natasha on Instagram